28ek batera: “Tolosaldean euskarak 365 egun!!”

Abenduaren 3an, Euskararen Nazioarteko Egunean, Tolosaldea osatzen dugun 28 herriek ekimen bateratua gauzatu dugu lehen aldiz. Herri guztien artean, ‘Tolosaldean euskarak 365 egun!!’ esaldiari forma eman diogu. Honetarako, herri bakoitzak esaldiaren letra bat irudikatu du herriko plazaren batean eta argazki baten bidez jaso da egindako irudia. Guztira 1.800 pertsona baino gehiagok hartu dute parte ekimenean eta gure aldarria urteko egun berezi horretan irudikatu badugu ere, urteko egun guztietan gure eskualdean euskaraz bizitzeko nahia adierazi dugu.

Herri bakoitzak egitarau desberdinarekin gauzatu du ekimena. Hori bai, herri guztiek adostutako adierazpena irakurri dute eta ondoren osatu dute herriari zegokion esaldia. Galtzaundi Euskara Taldetik herriei proposatutako ekimen bateratua izan da aurtengoa. 2018ko Euskaraldiaren atarikoa ere izatea da asmoa; Euskal Herri mailan, herriz herri, euskaldun Aho-biziak eta Belarri-prestak konprometitu, sare zabalak prestatu eta bultzatzea ekarriko duena.

Galtzaunditik ekimen xume hau antolatzeko lanean herriz herri aritu diren guztien lana eskertu nahi dugu eta baita ere egunean zehar Tolosaldeko Atariak eskainitako laguntza.

 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude